Luk 21 | ASO | STEP | Heneni nganeni aleve nete mono' numuno nabau' ofa moni milaa' ani' initeku' nene O'moso inite' lehizi-dika' lehizi-dika' navo Izesu' aza vokene' ogo ningine'.

Luke 21

Vene' Gevono' Mali'mo Ezela Minine' Inite' Muki' Nene O'moso Imine'

(Maleko' 12:41-44)

1 Heneni nganeni aleve nete mono' numuno nabau' ofa moni milaa' ani' initeku' nene O'moso inite' lehizi-dika' lehizi-dika' navo Izesu' aza vokene' ogo ningine'. 2 Ninge minine' nene gevono' goho' vene' mali'mo gulehe' moni sita' nomolavo ningo 3 evene' nene ti' lo lo-ngimine': Naza lamineto' nolo-lingimuve. Goho' vene' gevono' minine' me'mo moni huline' ne'mo evene' muki' hulani' nene ngivile' ogosa hulave. 4 Ne'mino ngivile' ogo hulave luvoni' nene evene' muki' ingine moni'ine vai' lo mininguti' hulani'za aza nene noso' nite've do soto' iline' inite' gohi ma minamivo inite' mata' goho' neinguti' nene hulave lo lo-ngimine'.

Mono' Numuno Naba Di Goloso Ilizangumu' Izesu' Lo-ngimine'

(Mataio' 24:1-2; Maleko' 13:1-2)

5 Izipahala zuho linge ingine mono' numuno naba ningi geheni laminedunu' luhuvo lahava izi gizani' nemu' nene siza nilavo Izesu' ti' lo line': 6 Lingine a'mine mono' numuno lamine' niningani' mene alinge' bili ngululubizikevo a'minguti' geheni setakisi bizi minamilisi gamene ma aloseive.

Soto' Iline' Initekumu' Longo' I-dikevo Geni Mulumo Inite' Soto' Ilingumu' Nene Lo-ngimine' Gamazi

(Mataio' 24:3-14; Maleko' 13:3-13)

7 Ne'mine lavo evene' ingine ti' li longo' i-dani': Tisazo, idise a'mine nolaine' inite' nene nanihe' soto' ogo ne'mine ilive. Ido' a'mine laine' inite' nene soto' ogo vo gihile izelesa neivo nene nanite' nanite' soto' ivo ningelone. 8 Ne'mine likevo aza ti' lo lo-ngimine': Evene' muki' nete nene igi neni' gulive'ne li a'mine O'moso'mo do lungu' izelive lo nimiselelesa live ma nene na'mo nouve ido' O'moso'mo molani' gamene ma nene mo ogave li lilisaze. Nete di gopo i-lingidikelizaze. nGe'meti vami ehe' igi ningisa minilo. 9 Ido' lovo soto' neive lilizahe ido' ngamanimu' lovo nihizave lilizahe nemu' gili ma golise gilami minilo. Ne'mine inite' nene ha soto' oloseine'za ne'mine inite' soto' o'mo viline' ne'mo nene gamene naba olihe do alitamoloseive. 10 Ne'mine lo gohi ti' lo lo-ngimine': Ido' misubo mau' ve nene misubo mau' vesi lovo hizilisave. Ido' guvelesi ve naba mali'mi zuhote guvelesi ve naba mali'mi zuhosi lovo hizilisave. 11 Ido' misubo ato atota nene mimi' nabasi ido' ga'na naba helaa' gamenesi soto' oka' oka' neivo a'midasi nene siki nite' naba hutile' oka' oka' o'mo vo mineleseive. Ne'mine neivo okulumoto' nene vodine vo lengehelele izeline' inite' muki' soto' oloseive. 12 Ne'mine oloseine'za a'mine inite' muki' nene olihe soto' amivo evene' nete adido' di goboni mili-lingidi mono' numungukisi galapuso numungukisi lengele'mizi di vi goni' i-lingidaa' ido' guve'inesi ve nabaliti ve'nido' ido' ngamani nabaliti ve'nido' lengele'mizi milaa' ilizani' nene neni' gulive'ne lengita minavo di minangumu' nene ne'mine mana'mine i-lingidilisave. 13 Ne'mine i-lingidilizani' ne'mo nene engi' ve'nido' neni' monovo'ne nene li soto' igi li-ngimilisave. 14 A'mine gameneu' nene neni' nene vetine do lapa nomine' o-lengedo gamazi gili vevesi mini lilizani' gamazi nene lengemekuvo engi' gamazi lilizani' nene belavo a'mine biluvatine muki' nete lengi' gamazi nene bililisa ilizaha mo bilamilisave. Nemu' nene lingine ti' li gili nge likisa minilo. Olihe gonito' lele'mizi mili-lidilisa navo ma gomu' nene nadive lolone lo gopo gate gelamolone li gili nge likisavo' nene minilo. 16 Ido' izetinge metinge nilizahe uvotinge nilizahe lengi' zuho nilizahe ido' zogo vetine nilizahe netesi nene adido' di goni' i-lingidikevo lengikuti' linge nene lingibili hililisave. 17 Ee, neni' gulive'ne di minilizangumu' evene' muki' nete lengikumu' nene muso ga'ine goloso dizeleseive. 18 Ne neiha ne'mine i-lingidilizangu' nene lengi' godotinguti' madudine zopovo hamo' nesi nene ngelo vo tolovo amoloseive. 19 Ne'mine mana'mine i-lingidi nizavo lingine gili huli mudise nenita gi'mizi minilizani' neloti' nene minevo' minevo' oga' lengemeni dameni dalisave.

Zelusalemi Numuno Ebe' Nene Lovo Vete Di Goloso Ilizangumu' Izesu' Line' Gamazi

(Mataio' 24:15-21; Maleko' 13:14-19)

20 Ido' Zelusalemi numuno ebe' nene lovo vete igi di goloso ilisa mine vodo vodo igi gesi ne'mini nihizavo ma nene lingine ti' li gililo: Eii, numuno ebe' muki' nite' mene mo di goloso gehepeve ilizani' gamene nene mo alitave li gililo. 21 Ne'mine navo ma nene a'mine Zelusalemi ebeku' nilizavesi ido' a'mine ebe' minine' misubo Zudaia misubo neukisi nilizave nene gololavo' nivilizave. Ido' Zelusalemi ebe' gahevela minani' aleve nene igi a'mine Zelusalemi numuno ebeku' nene dizamilizave. 22 Ido' ne'mine noluvoni' nene nemu' noluve: A'mine gamene soto' iline' nene a'minemu' mono' godolou' gizikani' gamazi muki' ma nene do gihile izelove losa O'moso'mo monovo goloso di soto' iga' angumu' lihime ngemeline' gamene mineleseive. 23 Agae, a'mine gameneu' nene izipaha'ine minine' venekumukisi ido' izipe amido' nizavo nizani' venekumukisi nene mo mulumo gele-ngedekuve. Ge'nebe goloso ilisave. A'mine gamenelo' nene me misubouko nene inite' goloso gehepeve soto' ogavo O'moso'mi izebolo've ne'mo me misubou' aleve nene do dingani hizo hite-ngedeleseive. 24 Ido' evene' linge nene bainati mitedunu' ngibili hililisave. Ido' linge ma nene galapuso ngimi numudo' namado' ebe' mukiku' ngele'mizi di vilisave. Ne'mine igi Zuda ve minamani' aleve heta ato' ve nete igi Zelusalemi aleve nene di hupi' izi-ngidi ngibili gizisa a'mine ebe' nene di ti' igi mini di dizi nizavo O'moso'mo molo-ngidine' gamenelo' nene osu' loloseive.

O'mosolati' Ve Gihile Tine' Molo Alingumu' Line' Gamazi

(Mataio' 24:29-31; Maleko' 13:24-27)

25 Ho', ike'ni, sonohi' engiku' nene ato ato' suno soto' noo-ngidivo guvo noso ne'mo izo pou' paa' lo nolo nolo nomolavo nemu' evene' zuho ato ato' ingine a'mine nene nigili vo'ine vo mulu'ine pou' loloseive. 26 Ido' Okulumoto' amuzo'inesi minani' inite' muki' nene mo'mongo' igi gabe' i gese' ilisanako ne'mine iline' nemu' evene' nete me misubou' nene inite' ato' ma soto' olosa neiko nanite' soto' ilivoo li gopo ga'ine gili mulu'ninguti' gohi dizo gohi dizo ivo minilisave. 27 Ne'mine navo O'mosolati' ve gihile naza nene amuzo'nesi ido' labana'ne nabasi do soto' ogo limuso avilelo' nolimuvo ningilisave. 28 Nemu' nene alinge' a'mine inite' soto' olosa api' neivo ma nene lingine O'moso'mo mudise do lu' izeline' gamene nene mo avito' ogave lisa lutine di upuho' i-di lutine otavo minilo.

Gamene Naba Soto' Ilingumu' Gohuno Zalo' Lo Molo Izesu' Aneza Gamazi Line'

(Mataio' 24:32-35; Maleko' 13:28-31)

29 Ido' Izesu' aza ne'mine lo aneza gamazi ma ti' lo lo-ngimine': Lingine lengi' Zuda veti misubotingu' mene gohuno zalo' nesi ido' za mukito' nesi nene ma ningi gili'nalo. 30 Avile gosoho' soto' olosa api' ogo gulumo liselesa neivo ma lingine nene ho' liline' gamene mo avito' ogave li langisetine ningi gilaa' nave. 31 Ido' a'mine'mine ogo a'mine veleta gomu' luvoni' inite' muki' nene soto' o'mo novivo ma lingine nene O'moso'mo eveneto' gizebo iline' gamene nene mo alitave li gililo.

32 Naza mo lamineto' nolo-lingimuve. A'mine inite' muki' soto' o'mo viline' nene idise nizani' aleve nesi nene olihe hili osu' lamavosi soto' oloseive. 33 Ido' Okulumoki misubogi nene ha vi osu' lilisasine'za a'mine gamazi'ne nene mo osu' lamo ele'vole' ogo mineleseive.

Gamene Nabamu' Gizebo Igi Minilizangumu' Izesu' Lo-ngimine' Gamazi Gizine'

34 Nemu' nene lingine negi hizi gopo minaa' ido' noso vauve ili ni sipaki igi minaa' ido' me misubou' minivi' alivi' ilizangumu' nesi giliivo' minaa' ilizani' nene gaha nete gelevuso neive li gilamado' lite' lo ngebelaa' neine' ne'mino gamene naba nene soto' o-lengedavo upuho' goloso ikelizaze. Monovotido' gizebo lamine' igi minilo. 35 A'mine gamene nene evene' muki' misubo mukiku' mini'mi monada nesi nene soto' o-ngedeline' nenako nemu' noluve. 36 Nemu' nene lingine lutine ongamivo mini O'moso'mo hize ele' o-ledavo a'mine soto' iline' inite' nene soto' o'mo novo a'mine'mo do gopo o-ledamivo mino O'mosolati' ve gihile aline' nene velelo' ha ote mineloningumu' ve li O'mosola gamene gamene liivo' minilo. 37 Izesu' aza gamene gamene go' laneme go' laneme' mono' numuno nabau' nene evene' mono' apize ngemo minaa' ine' ve. Ido' holuka' holuka' nene golo ma gulive Oliva nela ongalosa dizo vaa' ine' ve. 38 Ido' nedenga' holukati' aza ogo mono' numuno nabau' dize neivo evene' muki' ingine geti igi a'mine neida nene gamazi've gililisa di nubo iga' ani' ve.